ADIL

Manéhna nyérangkeun, kukuring ditéang. Semu éra kawasna, teuing sieun, boa ijid. Basa ditalék manéhna ngakuna Adil. Adil? Asa geus lila teu kadéngé éta ngaran téh. Paingan atuh teu wawuh. Beungeutna haropak awak badis rorongkong lain babasan. Pakéna rubag-rabig siga geus lila teu ngambeu cai, boa nu makéna ogé sarua. Teu kapaliré. Ditalék deui ti mana atawa ka mana waé ngakuna teu kamamana, mun teu panggih da geus teu dipikabutuh cenah. Hareneg. Naha enya? Boa heueuh. Ceuk saha, cekéngtéh, kuringmah butuh. Enya cenah matak nyérangkeun ogé. Tulungan, cenah. Naha tibalik? Pan kuring nu perlu pitulung téh ti Sang Adil.

JALAN CAGAK

Sora khotib ngagalindeng “man amana billahi wal yaumil akhir, qul khoiron au liyasmut-mun aranjeun ngaku iman ka Allah jeung poé akhir, mangka ngomong nu hadé atawa mending jempé”

Kadéngé deui sora Arman, “Pa, kieu yeuh… ieu isu nu kuurang diangkat dina biantara énjing, nu penting rahayat asa kawakilan sorana, tapi abdi gé tos ngobrol sareng si boss, anjeuna sayaga modal awal cenah nu penting ké dina jadina proyék ka manéhna” (22 Maret 2012)

Nu Balik Malem Lebaran

Leuseuh da puguh lalampahan jauh, jaba tiris kabina-bina abong janari usum katiga.

Sagala rasa kaubaran basa anjog panto aya nu mukakeun, geus titadi siganamah manéhna nungguan.

Tuh enya manéhna kaluar. Teu kawawa sono, komo basa sakolépat nempo si bungsu keur narima telepon, ti akina kitu? “Mamaaaah” Kadéngé budak ngageroan indungna. “Ieu aya telepon ti Ua”.

Oh geuning ki Lanceuk nu nelepon téh. Aéh heueuh kamana nya, naha teu bareng pan inditmah reureujeungan.

“Halow, …Kumaha?... Gustiiiiii! Telepon ngulapés nu narimana sigana kapiuhan.

Panasaran nya ngomong naon ki lanceuk téh. Kadéngé halon aya kénéh sora, “Sabar nyai, geus titis tulisna meureun, ayeuna gé akang di rumah sakit kénéh da sarua sa beus atuh nyuksruk di Godebag”.

Jumaah, 2 Agustus 2013

Kurang Nyusu

Bubar Jumaahan barudak tinglaliud hareupeun kios vcd bajakan nu lolobana ngajual kasét video klip amatiran. Loba pisan “penggemarna”  video klip nu kitumah, dalah mun aya dina nu hajatan gé rajeun sok pada ngajugjugan pajarkeun téh itung-itung ronggéng baheula.

Beuki meuweuhna jelema nu resep nongton kana sarupaning orat nu diobral, ceuk si Adun mah etatéh masalah nu gedé kacida jeung jelas éfistemologina cenah semu édég. Barudak bengong nempo pamolah si Adun nu siga kacalikan téh.

“Déngékeun siah”, cenah.  “Da lamun silaing kabéh nyusuna parat dua taun mah can tangtu pakokolot resep untap intip jeung tuang toong, komo ngahajakeun nempokeun orat mah”. “Pédah ilaing nyusuna parebut jeung bapa manéh, atawa dihilian ku susu sapi tah balukarna iliaing pan resep pisan kana paoratan téh, antukna nagara kacow, malah pamaréntah kudu nyieun satgas sagala, da di lembur déwék mah baheula satgas téh kumendan hangsip. (16 Maret 2012)